FR-Reise

Am Wucheendi vo 18./19. Oktober het eusi FR-Reis statt gfunde. Wos anä goht isch es Gheimnis gsi, wo trotz so villnä Fraue het chöne gwart wärde.

D’Info, dass mä für am Sunntig warmi Schueh und Kleider brucht het im Vorfeld

zu etliche Spekulatione gführt.

So hei mir eus den am Samstig Morge, fast komplett, mit bester Lune und unterschiedlich vill Gepäck uf der Bushaltstell igfunde. Eusi Reis isch per Bus und Zug bi bester Verpflägig, wiä mäs schienz vo FR-Reise nit anderst kennt, richtig Frutige gange. In Frutige hei leider ganz vill Tagestouriste euse vorreserviert Bus in Beschlag gnoh, drum händ mir d`Wartezyt mit schöttlä verkürzt und de nächsti Chauffeur isch in Gnuss cho eus alli nach Adelbode z’transportiere.

In Adelbode acho het eus wunderbars Wätter erwartet und mir händ euses

Gepäck im Hotel Apart deponiert. Witer isch es mit der Bahn ufd Sillerä gange, wo mir ä herrlichi Wanderig richtig Hahnemoos gmacht hei. Ufem Hahnemoos händ mir bi bestem Wätter und super Ussicht äs Pick-nick gmacht und d’Bergwält gnosse.

Nach derä Stärchig hets gheisse Trotti fasse und los isches gange de Berg durab.

Nach derä spassige Fahrt het mä ganz nach Beliebe chöne em Aperöle uf der

Sillerä fröhne oder no witers go Trotti frese. De nöchsti gmeinsami Treffpunkt isch s’Desalp gsi, schliesslich müänd mir jo teste wo mä am beste ikehrt. Nach erä gmüätliche Rundi und der Verwärfig vo der Idee als Tamdemtrotti zrug is Dorf z‘fahre sind mir alli wohlbehalte im Dorf acho. Im Hotel händ mir eus parat gmacht fürs Znacht und diä verblibendi Zyt individuell bi mä Fläschli Wyy oder mä Käffeli verbrocht. S`Znacht isch fein aber sehr üppig usgfalle und diä Eint oder Anderi hets nit ganz möge bodige. De Obe händ mir denn im Time Out usklinge loh.

Nach erä guete Nacht, trotz Rollbett und vereinzelte Schnarchler hei mir eus

früsch und erhohlt im Tea Room Schmidt troffe zum nä sehr feinä Brunch.

Vo Saft über diversi Fleisch- und Kässorte bis hi zu sensationellem Birchermüäsli

hets alles geh was s‘Härz begehrt. Dernoch isch es abgange richtig Ishalle. Wo mir vo es paar nätte Herre empfange worde sind. Sie händ eus verrote, dass mir eus jetzt wärde im Isstock schiesse versuäche. Somit isch jetzt au klar gsi, für was mir warmi Schuäh und Kleider händ müässe ipacke. Voller Tatendrang si mir zu Werke gschritte und eusi Instruktore hei eus mit all ihrem Wüsse und guete Rotschläg unterstützt. Dür Wille isch bi allnä do gsi und jedi het ihres Beste geh. Diä Einte händ sich als versteckti Talent entpuppt, bi Anderä bisch froh gsi händs s‘Wort Isstock schiesse nit zu wörtlich gnoh.

Uf jede Fall isches ä tolli Erfahrig gsi, das nit alltägliche Spieli, mol z‘teste und

mir und eusi Instroktore händ definitiv de Plausch gha. Leider neigt sich mit

derä Aktivität au euses Wucheend z‘end und mir mache eus mit de ÖV’s wieder

ufd Ruckreis.

Gsund und z‘friede chöme mir alli am Sunntig Obe wieder z‘Buus a und luäge uf

es tolls Wucheendi, wo bi spitze Wätter het dörfe stattfinde, zrug.

Beste Dank de Organisatorinne für die super Planig und diä toll Umsetzig vo

eusere Reis.

Bericht: Nadine Weiss