De Zooli isch z`Bsuech im Kitu

22.05.2015

Mir hend scho ganz viel zäme turnt und somit au erlebt. Eis vode Highlights isch s` Thema “Zirkus” gsi. D`Akrobate sind in gfürchiger Höchi übers Seil tanzt, d` Rössli sind im Galopp ide Manage umetrappt,  gfürchigi Löie sind durch Reife gsrpunge und d`Clowns hend üs mit ihrne witzige Zaubereie zum Lache brocht. Nachdem üsi  chline Zirkusexperte em Zirkus tschüss gseit hend, isch es au scho witer gange. Mit em Schiff sind mir los tuckerlet ufe andere Kontinent und so het üsi Weltreis ihre Afang gno. Mir sind am Nordpol go schlittle, hend e Kamelrit durch d`Wüeschti erlebt, sind ufe grösti Berg vode Welt gwanderet und hend no vieli anderi Abentür erlebt. Schlussendlich sind mir aber in Amerika stecke bliebe, well üs diä Indiander so fasziniert hend. Die chline Indiander hend glernt, wie mir sich luutlos aschlicht und Pfilboge schiesst. De Indianerhäuptling isch mit üs uf Bisonjagt und het üs zum Spass an Marderpfahl gfesselt. Die Ziit im Tippizelt isch unvergesslich gsi und het üs ganz viel Spass gmacht.
Doch jedi Reis goht mol z`End und so hend mir üs mit Schiff, Zug, Auto und Flugzüg wieder ufe Heimweg gmacht. Aber wie ihr wüsset, chönne mir nit lang ohni Abentür si. Dorum isch es nit lang gange und mir sind scho wieder im nögschte glandet. Das mol hend mr üse Auge fast nit chönne traue. De Zooli isch z`Buech im Kitu. Mir hend mit de Bäre kämpft, sind mit de Delfin durchs Meer gschwumme, hend üsi Flügel usbreitet und sind mit de Vögel am Himmel umegfloge. Naürlich sind üs au d` Tiger, Löie,  Salamander, Elefante , Schlange, Krokodil und vieli meh cho bsueche. Lustig ischs natürli mit de Affe gsi, wo mir üs mit de Liane vo Baum zu Baum gschwunge und viel Banane vrspiesst hend.  Mir turne immer no jedi Wuche neui Tier, hend viel Spass zeme und sind immer wieder gspannt, was üs als negsts erwartet.

Please reload

© 2019 by Diego Zumbrunn